«Самұрық-Қазына» AIX алаңында алғаш рет панда-облигацияларды орналастырды

Көлемі 3 млрд юань, айналым мерзімі 3 жылды құрайтын дебюттік облигацияларды шығару рекордтық төмен кірістілікпен — жылдық 2,18% деңгейінде орналастырылды.

Бұл қытайлық институционалдық инвесторлардың жоғары сенім білдіретінін (қордың кредиттік рейтингтері – дербес рейтинг деңгейінде) көрсетеді және эмитенттің жоғары кредиттік сапасын растайды.

Аталған мәміле өңірдегі маңызды атаулы оқиғаға айналды:
- Қытайдың ішкі қарыз нарығына тікелей қатысу мүмкіндігі пайда болды
- капитал нарығын дамытуда жаңа кезеңге жол ашты
- халықаралық қаржыландыру мүмкіндіктері кеңейтілді

Рәсімге «Самұрық-Қазына» АҚ басшылығы, халықаралық қаржы институттарының өкілдері, жетекші андеррайтерлер мен мәміле серіктестері, соның ішінде Bank of China, China International Capital Corporation, China Construction Bank, Deutsche Bank (China) өкілдері, сондай-ақ заң кеңесшілері қатысты.

«Самұрық-Қазына» басшысы Нұрлан Жақыпов: «Бұл – жаһандық капитал нарықтарына қатысу жолындағы маңызды қадам — біз алғаш рет Қытайдың ішкі нарығына шықтық. Облигацияларды орналастыру инвесторлардың қорға, оның қаржылық тұрақтылығына деген сенімдерінің жоғары екенін көрсетті», – деді.

Жақыпов қаражат «Самұрық-Қазына» тобының негізгі инвестициялық жобаларын іске асыруға бағытталатынын айтты.

Салтанатты шара соңында Astana International Exchange алаңында сауданы іске қосу рәсімі өтті: іс-шараға қатысушылар сауданың басталғанын білдіретін батырманы басып, биржадағы панда-облигациялардың айналымын ресми түрде ашты.